Украинага қишда омон қолишга ёрдам беришимиз керак — Макрон
Парижда “Украина халқи билан бирдамлик” конференцияси бўлиб ўтмоқда.
Украина жорий қишдан омон қолиш учун ёрдамга муҳтож ҳамда кўмак жуда тез ва аниқ бўлиши керак. Бу ҳақда Парижда “Украина халқи билан бирдамлик” донор конференциясининг очилишида Франция президенти Эммануэл Макрон айтиб ўтди.
“Ҳамма Украина билан бирдам ва елкама-елка бўлиш, ёрдамини бир дақиқага ҳам сусайтирмаслик истагини исботлаш учун сафарбар бўлмоқда. Бу фақат Украина учун кураш эмас, бу — барқарорлигимиз учун халқаро кураш ”, — деди Франция раҳбари.
Унинг таъкидлашича, эндиликда ҳамма Украина халқига ёрдам бериш муҳимлигини тушуниши керак.
“Биз Украинага қишда омон қолишга ёрдам беришимиз лозим. Конференция натижалари жуда аниқ бўлишини истаймиз”, — деди Макрон.
Тадбирда Украинанинг ҳамкорлари, дўстлари ва халқаро гуманитар ташкилотларда ишлаётганларни сафарбар этиш, аҳолини сув, электр, иссиқлик, кийим-кечак билан таъминлашга ёрдам берадиган тадбирларни ташкил этиш ҳақида сўз боради.
Шунингдек, президент 700 дан ортиқ француз корхоналари Киевга узоқ муддатли сармоя киритишда иштирок этишини айтди.
Эслатиб ўтамиз, Париждаги “Украина халқи билан бирдамлик” конференцияси Россиянинг мамлакат энергетика инфратузилмасига берган зарбалари муносабати билан мамлакатга қўшимча халқаро ёрдам беришга бағишланган.
