Британия Эроннинг сара махсус кучларини террорчи ташкилот деб эълон қилмоқчи
У билан алоқада бўлганлар жиноий жавобгарликка тортилади.
Британия ҳукумати бир неча ҳафта ичида Эроннинг Ислом инқилоби қўриқчилари корпусини террорчи ташкилот деб эълон қилмоқчи. Бу ҳақда “The Telegraph” ёзмоқда.
Маълумотларга кўра, бу қарорни Британия Ички ишлар вазирлиги раҳбари Суэлла Браверман ва унинг ўринбосари, хавфсизлик вазири Том Тугендхат қўллаб-қувватламоқда. Агар корпус террорчи ташкилотлар рўйхатига киритилса, унга аъзолик, рамзларини тақиш ва фаолиятини қўллаб-қувватлаш жиноий жавобгарликка тортилади. Гуруҳ Эронда сентябрь ойида бошланган тартибсизликлар чоғида қўпорувчилик фаолиятига раҳбарлик қилгани айтилади.
2019 йили Қўшма Штатлар Эрон Ислом инқилоби қўриқчилари корпусини террорчи ташкилот деб тан олган ва унга қарши санкциялар киритган. 2022 йилда Эрон ҳукумати ядровий келишув доирасидаги санкцияларни бекор қилишни талаб қилган, бироқ кейинчалик бу талабдан воз кечган. Декабрь ойи охирида Эронда етти киши Британия разведка хизматлари билан алоқадорликда айбланиб ҳибсга олинганди.
