Эрдоған Ғарбга жиддий айблов қўйди
Туркия президенти Анқаранинг Россия — Украина можаросини ҳал этишга ҳаракат қилаётганини эслатиб қўйган.
Ғарб давлатлари Россия-Украина можаросини ҳал қилиш учун ҳеч нарса қилмаяпти. Бу ҳақда Туркия президенти Ражаб Тоййиб Эрдоған маълум қилди.
"Халқаро ҳамжамият низони ҳал қилиш учун нимадир қилдими? Ҳамма қурол савдогарларига ёрдам бермоқда. Биз эса тинчликка эришиш ҳақида ўйлаяпмиз, шунинг учун бир вақтнинг ўзида Путин ва Зеленский билан гаплашяпмиз. Бу йўлда чин дилдан ҳаракат қилишда давом этамиз", — деган Туркия президенти.
Ёзда Европол Украинадан қурол контрабандаси амалга оширилаётганини аниқлаганди. Хусусан, даркнетда Американинг Javelin танкка қарши ракетаси савдога қўйилганди.
Туркия Россия-Украина музокараларини ташкил этишга ҳаракат қилаётган дунё етакчиларидан бири бўлиб турибди.
