Грузия нима учун Украинага ҳарбий ёрдам бермайди?
Мамлакат бош вазири ўринбосари бу масалага ойдинлик киритди.
Грузия ўзини Украина низосига тортилишига йўл қўймайди. Бу ҳақда мамлакат бош вазири ўринбосари Тея Цулукиани маълум қилди.
Бундан аввал Украинанинг Грузиядаги ишончли вакили Андрей Касьянов “Европа ҳақиқати” нашрига ёзган мақоласида Киев Тбилисидан 2008 йилда тақдим этилган “Бук” тизимларини қайтиришни сўраганини ёзганди. Грузия мудофаа вазирлиги бунга рад жавобини бериб, техника учун бир неча миллион доллар тўланганини маълум қилган.
“Жавоб битта — грузин ҳукумати Грузия давлатини ҳарбий қарама-қаршиликка тортишга бўлган уринишларга йўл қўймайди. Шунинг учун биз можаронинг ҳеч қайси томонига ҳарбий ёрдам бермаймиз”, – деган Цулукиани.
Тбилиси бундан аввал ҳам Киевга ҳарбий ёрдам кўрсатишдан бош тортганди. Украина президенти офиси раҳбари маслаҳатчиси Михаил Подоляк эса Грузияни қарийб бир йиллик низодан кейин ҳам кимнинг тарафида туришни билмасликда айблаганди.
