Ўзбекистонда уйқу марказлари хизмат кўрсатади

 

Президент «Фтизиатрия ва пульмонология хизматини 2023–2026 йилларда янада ривожлантиришга йўналтирилган чора-тадбирлар тўғрисида»ги қарорни имзолади. Бу ҳақда ЎзА хабар берди.

 

Қарор билан тунги уйқу сифати ва нафас олиш функцияси бузилишларини ташхислаш ва даволаш мақсадида ҳудудий фтизиатрия ва пульмонология марказларига ажратилган штат бирликлари ва маблағлар доирасида «Уйқу апноэ» марказлари ташкил қилинади.

 

Шундай тартиб ўрнатиладики, унга мувофиқ, 2023 йилдан бошлаб ҳар йили:

 

• латент туберкулёз инфекциясига скрининг текширувлари сони 1 миллион нафаргача;

• латент туберкулёз инфекциясига чалинган шахсларни даволаш қамрови 21 минг нафаргача;

• туберкулёз микобактериясини бир вақтнинг ўзида 1- ва 2-қатор туберкулёзга қарши дори воситаларига резистентликни аниқлайдиган тезкор ген-молекуляр ташхислаш қамрови 120 минг нафаргача;

• туберкулёз билан касалланган 18 минг нафаргача беморларни дори воситалари билан таъминлаш, шу жумладан:

• 1-қатор (дорига сезувчан туберкулёз билан касалланган беморлар) бўйича – 15 минг нафаргача;

• 2- ва 3-қаторлар (дорига резистент туберкулёз билан касалланган беморлар) бўйича – 3 минг нафаргача етказилади.

 

Шунингдек, 2023 йил 1 мартга қадар туман (шаҳар) тиббиёт бирлашмалари томонидан бирламчи тиббиёт муассасаларига бириктирилган аҳоли орасидан туберкулёз билан касалланишга мойиллиги бўлган хавф гуруҳига мансуб шахслар рўйхати тузилади,

 

туман (шаҳар) тиббиёт бирлашмаси мутахассислари томонидан туберкулёз билан касалланиш хавф гуруҳига мансуб:

 

• шахслар (ўсмирлар ва катталар) рентгенологик текширувдан;

• болалар иммунологик текширувдан ўтказилади.