Ҳудудларда газ захираси етарлими?
Энергетика вазирлиги масъул ходими ҳозирда ҳудудларда мавжуд газ захираси ҳақида маълумот берди.
АОКАда ўтказилган брифингда Энергетика вазирлиги масъул ходими Обиджон Дилмуродов маълум қилишича, 29 январь куни электр станциялар орқали 222 млн 500 минг кВт-соат электр энергияси ишлаб чиқарилди. Республика истеъмолчиларига 217 млн 700 минг кВт-соат электр энергияси етказиб берилди.
Шунингдек, газ таъминоти корхоналари томонидан истеъмолчиларга 145 млн 400 минг куб метр табиий газ ва 1100 тонна суюлтирилган газ етказиб берилди. Ҳозирда ҳудудларда 2 500 тонна суюлтирилган газ ҳамда 23 500 дона газ баллонлари захираси мавжуд.
Аҳоли ва бюджет ташкилотларини кўмир маҳсулотлари билан таъминлаш мақсадида 3 минг 400 тонна кўмир ҳудудлардаги омборларга ортиб юборилди.
Корхоналарда қазиб чиқариш ва ишлаб чиқариш ишлари ўрнатилган тартибда олиб борилмоқда. Барча корхоналарда штаблар тузилган, 24 соатлик навбатчилик ташкил қилинган.
Зарур чора сифатида республикамизнинг айрим ҳудудларида электр таъминотида бир ярим соатдан икки соатгача чекловлар киритилди.
Кўрилган чоралар натижасида электр тармоқларида юзага келган носозликларни тўлиқ бартараф этишга эришилди.
Газ тармоқларида табиий газ босими кўтарилиши натижаси 1 кунда 11 та маҳалладаги 12 минг 784 та хонадоннинг табиий газ таъминоти яхшиланди.
Бугунги кунда Тошкент, Фарғона, Андижон, Наманган, Самарқанд, Сурхондарё, Бухоро, Жиззах ва Сирдарё вилоятларининг айрим хонадонларида газ босимини меъёрга келтириш ишлари давом эттирилмоқда.
Газ тармоқларида содир бўлаётган носозликларни бартараф этиш ишлари истеъмолчиларни олдиндан огоҳлантирган ҳолда амалга оширилмоқда.
Шунингдек, вазирлик ва тизим ташкилотларининг масъул ходимлари ҳудудларга сафарбар этилган бўлиб, истеъмолчиларни барқарор энергия ресурслари билан таъминлаш бўйича зарур чоралар кўрилмоқда.
Тармоқларда юзага келиши мумкин бўлган ва кузатилаётган носозликларни бартараф этиш мақсадида электр ва газ таъминоти корхоналарида туну-кун ишлайдиган 1 000 дан ортиқ махсус бригадалар ташкил этилган бўлиб, улар жойларда муаммоларни тезкорлик билан бартараф этилишини таъминламоқда.
