Бухорода вояга етмаган қиз машина ўғирлади
Ҳозирда унга нисбатан жиноят иши очилган.
Бухоро вилоятининг Вобкент туманида 17 ёшли қиз машина ўғирлади. Бу ҳақда вилоят ИИБ ахборот хизмати хабар бермоқда.
Жорий йилнинг 2 февралидан 3 февралига ўтар кечаси номаълум шахс Вобкент тумани «Халач» маҳалласида фуқаор Р.Э.га тегишли «Дамас» русумли автомашинасини ўғирлаб олиб қочган.
Мазкур ҳолат юзасидан вилоят ички ишлар бошқармаси томонидан “тўсиб ушлаш” махсус тезкор режаси ҳаракатга келтирилиб, ушбу автомашина халқаро аҳамиятга эга бўлган А-380 автомобиль йўлининг 69-километрида тўхтатиб ушланган.
Аниқланишича, мазкур жиноятни жабрланувчининг маҳалладоши — 2005 йилда туғилган T.Ш. исмли вояга етмаган қиз содир этган.
Ҳолат юзасидан Жиноят Кодексининг 267-моддаси 2-қисми билан жиноят иши қўзғатилиб, ҳозирги кунда дастлабки тергов ҳаракатлари олиб борилмоқда.
