Шимолий Америка осмонидаги уриб туширилган объектлар аслида нима эди ?
АҚШ ва Канаданинг боши қотган.
Канада ҳукумати ўтган ҳафта Канада ва АҚШ ҳаво кенгликларида уриб туширилган объектлар нима экани ва қайси давлатга тегишли эканини билмайди. Бу ҳақда мамлакат бош вазири Жастин Трюдо маълум қилди.
"Биз бу объектлар нима эканлигини ҳали аниқ билмаймиз, лекин улар фуқаролик ҳаво қатновига ҳақиқий хавф туғдирганини биламиз, шунинг учун керакли чораларни кўришга мажбур бўлдик", — деди бош вазир.
Шимолий Америка Қўшма Аерокосмик Мудофаа Қўмондонлиги (НОРАД) томонидан уриб туширилган учта объект ҳақида Трюдо "ҳали жавоб берилиши керак бўлган кўплаб саволлар мавжудлигини" таъкидлади.
“Ва биз америкалик ҳамкорларимиз билан бу жавобларни топиш учун ишлаяпмиз”, - дея хулоса қилди у.
Аввалроқ АҚШ президенти Жо Байден ўтган ҳафта Шимолий Америка осмонида уриб туширилган учта шар хорижий разведка машиналари эмас, балки хусусий компаниялар ёки тадқиқот муассасаларининг ҳаво шарлари бўлган, деб ҳисоблашини айтганди.
Ўтган ҳафта НОРАД учта номаълум объектни рўйхатдан ўтказди, улардан иккитаси АҚШ ҳарбийлари томонидан миллий ҳаво ҳудудида ва биттаси Канада ҳудудида уриб туширилган. Таъкидланишича, учала объект ҳам аввал уриб туширилган Хитой шаридан анча кичикроқ бўлиб, пастроқ баландликда ҳаракатланган ва ташқи кўриниши ҳам Хитой аэростатига ўхшамайди.
