Энди мактаб ўқувчилари дарсларга бориши шарт эмасми?
Вазирлик ижтимоий тармоқда тарқалган хабарларга изоҳ берди.
Ижтимоий тармоқларда мактаб ўқувчилари энди олдиндан битирув имтиҳонларини топширишлари ва мактаб дарсларига бормасликлари мумкин, деган мазмунда хабарлар тарқалмоқда.
Мактабгача ва мактаб таълими вазирлиги ушбу хабарлар ҳеч қандай асосга эга эмаслигини ва ёлғон маълумот эканлигини билдирди.
Қайд этилишича, бу хабарлар мактабни ўз вақтида тугата олмаган, яъни мактаб ёшидан ўтган фуқароларнинг экстернат тартибида имтиҳон топшириш учун аризалар бериш билан боғлиқ хабарнинг нотўғри талқин қилинганлиги натижасида тарқатилмоқда.
“Таълим тўғрисида”ги қонунга мувофиқ, фуқароларнинг умумий ўрта таълим олиш ҳуқуқини таъминлаш мақсадида экстернат тартибида имтиҳонларда фақат ўз вақтида турли сабабларга кўра умумий ўрта таълимни якунлай олмаган, аниқроқ айтганда, мактабни тўлиқ битирмаган 18 ёшдан ошган фуқаролар иштирок этади.
“Экстернат тартибидаги имтиҳонларнинг мактабда таълим олаётган ўқувчиларга алоқаси йўқ ва уларга татбиқ этилмайди”, — дейилади хабарда.
