Эрон–Саудия Арабистони муносабатлари тикланмоқда
Томонлар бир неча кунлик музокаралардан сўнг келишувга эришди.
Эрон ва Саудия Арабистони Хитойда муносабатларни нормаллаштириш ва элчихоналар очишга келишиб олди.
Алоқалар 2016 йили Саудия Арабистони ҳукумати ва шиалар ўртасидаги можаро, шунингдек, Теҳрондаги Ар-Риёд элчихонасидаги тартибсизликлардан сўнг узилганди. Пекинда давом этган бир неча кунлик уч томонлама музокаралардан сўнг Эрон ва Саудия Арабистони муросага келишди. Улар келгуси икки ой ичида дипломатик муносабатларни тиклашга ва ўз элчихоналарини қайта очишга қарор қилди.
Хабар қилинишича, Эрон Миллий хавфсизлик олий кенгаши котиби Али Шамханий Теҳрон ва Ар-Риёд ўртасидаги келишмовчиликларни бартараф этиш бўйича саудиялик ҳамкасби билан интенсив музокаралар олиб бориш учун 6 мартдан бери Пекинда бўлган.
