Бош вазирга матбуот котиб тайинланди
Бекзод Шукуров тайинловга қадар Вазирлар Маҳкамаси Туризм, маданият ва оммавий коммуникациялар масалалари котибиятининг Оммавий коммуникациялар ва ахборот очиқлигини таъминлаш масалалари шуъбаси мудири вазифасида ишлаб келаётган эди.
Бекзод Абдуқаюмович Шукуров Ўзбекистон Республикаси Бош вазирининг матбуот котиби этиб тайинланди.
Бекзод Шукуров Ўзбекистон Миллий университетининг журналистика факулътети тамомлаган. 2002-2014 йилларда “Ўзбекистон овози” газетасида мухбир, бўлим мудири, бош муҳаррир ўринбосари бўлиб ишлаган. 2014-2018 йилларда “Жамият” газетасининг бош муҳаррири бўлган, 2018 йилдан буён Вазирлар Маҳкамасида оммавий ахборот воситаларини ривожлантириш масалалари бўйича бош мутахассис вазифасида ишлаган.
“Ўзбекистон овози” газетасида ижтимоий-сиёсий мавзулардаги, хусусан сайловлар, парламент фаолияти, айниқса, сиёсий партиялар ўртасидаги баҳс-мунозараларга бағишланган мақолалари билан жамоатчиликка танилган. “Жамият” газетаси унинг бош муҳаррирлигида таҳлилий-танқидий мақолалари билан кўпчиликнинг эътиборига тушган.
Бекзод Шукуров 2011 йилда “Олтин қалам” миллий мукофоти учун халқаро танлов ғолиби бўлган. 2017 йилда “Эътироф” миллий танловида йилнинг энг яхши публицисти деб топилган.
