Сурия ва Саудия Арабистони мулоқотга тайёр – ОАВ
Мамлакатлар ўртасида муносабатлар тикланиши айтилмоқда.
Дамашқ ва Ар-Риёд дипломатик муносабатларни тиклашга тайёр, дея хабар бермоқда «Reuters» нашри.
Яқин келажакда Саудия Арабистони элчихонаси Дамашқда ўз эшикларини очиши мумкин. Саудия Арабистонининг Сурия президенти Башар Ассад билан муросага эришиш қарори кўп жиҳатдан араб давлатларининг Эроннинг Сурия ҳудудига таъсирини чеклаш, шунингдек, бир қатор бошқа минтақавий муаммоларни ҳал қилиш истаги билан боғлиқ. Дамашқ билан Ар-Риёдни яқинлаштириш учун фаол ҳаракат қилаётган томонлардан бири Москва эди.
«Reuters» Сурия разведкасининг юқори мартабали амалдори Ар-Риёдга ташриф буюрганидан кейин шундай қарорга келгани ҳақида ёзмоқда. Айни пайтда баъзи араб нашрлари Сурия президентининг акаси Маҳер Асаднинг Ар-Риёдда бўлганини даъво қилмоқда.
Айрим маълумотларга кўра, Дамашқ ва Ар-Риёд Рамазон ойи охирида нишонланадиган Ийд ул-Фитр (Ҳайит) байрамидан сўнг ўз элчихоналарини очишга ҳозирлик кўрмоқда. Аввалроқ TASS ўз манбаларига таяниб, Саудия Арабистони ташқи ишлар вазири Файсал бин Фархон Ол Сауд Рамазон ҳайити куни Дамашққа ташриф буюриши мумкинлигини маълум қилганди.
