Германия хатога йўл қўйди–Матеуш Моравески
Полша бош вазири Германия Украинани етарли даражада қўллаб-қувватлай олмаётганини айтди.
Полша бош вазири Матеуш Моравески Европа Иттифоқи етакчиларининг Брюсселдаги саммитидан сўнг Германия Украинани етарли даражада қўллаб-қувватлай олмаётганини айтди.
“Улар керак бўлган даражада сахий эмас”, – дея қўшимча қилган у.
Жаноб Моравески Берлин ўз сиёсатида ўзгаришлар қилгани, жумладан, қуролли кучларини модернизация қилишга катта сармоя киритгани ва уруш ҳудудига қурол жўнатиш тақиқини бекор қилганини тан олди. Шунингдек, у Германиянинг Украинага «Леопард» жанговар танкларини юбориш қарорини ҳам қайд этди.
Полша бош вазири Германиянинг ўтмишдаги энергетика сиёсати ҳақида ҳам гапирди.
“Германия қазиб олинадиган ёқилғи бўйича бизнес модели учун бутунлай Россияга боғлиқ бўлиб, драматик хатога йўл қўйди”, – деди Моравески.
Бундан ташқари, Матеуш бир нечта таклифларни билдирди. Унинг фикрича, НАТО давлатлари ўз харажатларини ялпи ички маҳсулотнинг 3 фоизигача кескин ошириши, Европа Иттифоқи мудофаа мақсадлари учун янги қарзларни жалб қилиш имкониятларини ўрганиши, шунингдек, музлатилган Россия активларини тезда ҳарбий амалиётларга йўналтириши керак.
