Шимолий Корея ядро қуроли портлашини машқ қилди
Кеча КХДР Япон денгизи томон иккита баллистик ракета учирганди.
Шимолий Корея 27 март куни Япон денгизига баллистик ракета учирганини тан олди. Бу ҳақда "Ренхап" агентлиги хабар берди.
КХДР бу синов ядро қуроли портлаши имитацияси эканини таъкидлаган. Кеча Япония ва Жанубий Корея ҳарбийлари баллистик ракеталар учирилгани тўғрисида маълум қилганди. Расмий Пхеньянга кўра, ядро портлаши имитацияси 500 метр баландликда ўтказилган. Унда "ер-ер" туридаги тактик баллистик ракеталардан фойдаланилган.
Ким Чен Ин ядро қуролига зарур материалларни ишлаб чиқаришни кўпайтиришга чақирди. У мамлакат ҳар қандай ҳолатда бу турдаги қуролдан фойдаланишга тайёр бўлишини айтган.
КХДРнинг Жанубий Корея ва АҚШ билан муносабатлари совуқлашгач, ракета синовлари кескин кўпайди. Ўтган ҳафтада Республика биринчи марта сув ости дронини синовдан ўтказганди.
