Буюк Британия ташқи ишлар вазири: Биринчи навбатда Киевга урушда ёрдам бериш лозим
Жеймс Клеверли ҳозир Украинанинг НАТОга кириши ҳақида жиддий муҳокама қилиш вақти эмаслигини таъкидлади.
Клеверли Politico нашрига берган интервьюсида НАТОнинг 2008 йилги Бухарест саммитида Украина охир оқибат альянсга қўшилиши ҳақидаги мажбуриятини тан олди, лекин бу кейинги босқичда муҳокама қилинишини айтди.
Клеверлининг фикрича, асосий масала, албатта, ўзини-ўзи ҳимоя қилишдир.
"Украиналиклар ва албатта, бутун Украина ҳозир юз бераётган шафқатсизлик келажакда такрорланмаслигини истайди", — деб таъкидлади Клеверли.
Айни дамда НАТО иттифоқчилари Украинанинг НАТОга аъзоликка интилиши борасида турлича фикрда.
Politico'нинг ёзишича, Лондон ва Вашингтон муҳимроқ сиёсий масалаларни кейинга қолдириб, Киевга зудлик билан амалий ёрдам беришга эътибор қаратмоқчи. Бироқ шарқий Европадаги бир қатор иттифоқчилар ҳозир Украинани иттифоққа яқинлаштирмоқда.
