Қатар ва Баҳрайн 6 йиллик "араз"ни унутди
Икки давлат 2017 йилда узилган дипломатик муносабатлар қайта тикланганини эълон қилди.
Бу Баҳрайн-Қатар қўмитасининг Ар-Риёддаги форс кўрфази Араб давлатлари ҳамкорлик Кенгаши бош котибиятининг штаб-квартирасида бўлиб ўтган иккинчи йиғилишида маълум қилинди.
"Бирлашган Миллатлар ташкилоти Устави ва 1961 йилдаги вена дипломатик алоқалар шартномаси қоидаларига мувофиқ икки мамлакат ўртасидаги дипломатик муносабатларни тиклаш тўғрисида қарор қабул қилинди", — дейилади BNA агентлик баёнотида.
Эслатиб ўтамиз, салкам 6 йил аввал Саудия Арабистони, Баҳрайн, Бирлашган Араб Амирликлари ва Миср Қатарни терроризмни қўллаб-қувватлашда айблаб, у билан дипломатик алоқаларини узган ва транспорт блокадаси ўрнатган эди.
