Бухорода ИИБ ходимлари ва солиқчи муштлашди

 

Ижтимоий тармоқларда Бухоро вилоятининг Олот туманида ИИБ ва солиқ идораси ходимлари ўртасида жанжал юз бергани акс этган видео тарқалди. Ҳолат бўйича вилоят ИИБ расмий муносабат билдирди.

 

Ҳолат жорий йил 22 апрель куни соат 16:00 ларда ЙПХ инспекторлари — катта сержант Ж.С. ҳамда сафдор К.Б. ўзларининг хизмат ҳудуди ҳисобланган туман марказидаги Маърифат кўчасида хизмат олиб бораётган вақтларида содир бўлган. Улар Нехиа ҳайдовчиси Ф.Ж. шу кўчани кесиб ўтувчи йўлни ажратиб турувчи бетон тўсиққа урилиб, унга шикаст етказганига гувоҳ бўлишган ва ушбу ҳолатни расмийлаштириш мақсадида ҳодиса жойига зудлик билан етиб келишган.

 

Шу вақтда мазкур ҳолатга умуман алоқаси ва дахлдорлиги бўлмаган 1993 йилда туғилган, Бухоро вилояти Давлат Солиқ бошқармаси Қоракўл тумани бўлими маъмурий амалиёт юристи, Олот тумани «Чорбоғ» маҳалласида яшовчи Н.Ў. ҳодиса жойига етиб келиб, ҳеч бир сабабсиз ҳолатни расмийлаштираётган ИИБ ходимларининг хизмат фаолиятига фаол қаршилик кўрсатган. У хизмат вазифаларини бажариб турган ходимларни турли ножўя сўзлар билан ҳақорат қилиб, куч ишлатган ва турли даражадаги тан жароҳатларини етказган.

 

Жанжал оқибатида катта сержант С.Ж.нинг “ўнг қўл 4-5 бармоқларида ҳамда ўнг қўл тирсак соҳасида шилинма”, сафдор Б.К.нинг эса “бўйин соҳасида шилинма” каби “соғлиқнинг бузилишига сабабчи бўлмаган енгил шикаст” тоифасига кирувчи тан жароҳатлари етказилганлиги аниқланган.

 

Мазкур ҳолат содир бўлган вақтда катта сержант С.Ж. ҳамда сафдор Б.К.лар ҳушёр ҳолда хизмат вақти ҳамда хизмат кийимида бўлган.

 

Ҳозирда ушбу ҳолат юзасидан Олот тумани прокуратураси томонидан Жиноят Кодексининг 219-моддаси билан жиноят иши қўзғатилиб, айбланувчи Н.Ў.га нисбатан “уй қамоғи” эҳтиёт чораси қўлланилган ҳолда дастлабки тергов ҳаракатлари олиб борилмоқда. 

 

“Тергов якуни бўйича айбланувчининг ҳаракатларига ҳуқуқий баҳо берилади”, — дейилади хабарда.