Фарғонада болалар психотроп дори билан ушлангани айтилди
Ҳолат бўйича вилоят ИИБ муносабат билдирди.
Ижтимоий тармоқларда 15-18 ёшдаги қиз ва йигитларнинг психотроп моддалар билан ушланганлиги ҳақидаги видео тарқалди. Ҳолат юзасидан Фарғона вилоят ИИБ маълумот берди.
Маълум бўлишича, 22 апрел куни Олтиариқ тумани Жарқўрғон МФЙда яшовчи фуқаро М.У 102 рақамига мурожаат қилиб, шу маҳалладаги ўзига тегишли бўлган боғ шийпонига номаълум шахслар жанжал қилиб, кириб олганлигини маълум қилган.
Юқоридаги манзилга профилактика инспекторлари етиб боришганда у ерда шу туманда истиқомат қилувчи Ф.М., Ж.О. ҳамда вояга етмаганлар М.Р. ва Б.А.лар бор эканлиги аниқланган. Уларга нисбатан Маъмурий жавобгарлик тўғрисидаги кодекснинг 45,183-моддалари билан ҳужжатлар расмийлаштирилган ва жиноят ишлари бўйича Олтиариқ тумани судига юборилган.
Суд томонидан 04 май куни уларнинг 2 нафарига юқоридаги моддаларга асосан базавий ҳисоблаш миқдорининг 3 баробари миқдорида жарима жазоси тайинланган.
Шунингдек, фуқаро Ф.М. туман ИИБга мурожаат қилиб, ушбу видеони ижтимоий тармоқларга тарқатган шахсни аниқлаб, қонуний чора кўришни сўраган. Видеотасвирларни тарқатган Ҳ.Ҳ. аниқланиб, унга нисбатан Маъмурий жавобгарлик тўғрисидаги кодекснинг 46 прим 2-моддаси билан ҳужжатлар расмийлаштирилган ҳамда суд томонидан БҲМнинг 3 баробар миқдорида жарима жазосига тортилган.
“Юқоридаги шахсларнинг ёнини кўздан кечириш жараёнида психотроп моддалар ёки совуқ қуроллар аниқланмаганлигини ҳам маълум қиламиз”, — дейилади хабарда.
