"Душман йўқ дема, у жардан нарида" — Тоқаев

 

Қозоғистон президенти Қосим-Жомарт Тоқаев якшанба куни ҳарбий хизматчиларни Ватан ҳимоячилари куни билан табриклади.

 

Тоқаев табригида мудофаа қобилиятини доимий равишда ошириш Қозоғистоннинг стратегик вазифаларидан бири эканини алоҳида таъкидлади.

 

"Мудофаа қобилиятини доимий равишда ошириш давлатнинг стратегик вазифаларидан биридир. Қозоғистон армияси ватанни қатъият билан ҳимоя қилишга ҳар дақиқада тайёр бўлиши керак. Қуролли кучлар мамлакат суверенитети ва яхлитлигининг ишончли кафолати, давлатнинг мустаҳкам таянчи, халқнинг ҳамжиҳатлиги ва эртанги кунга ишонч қўрғони вазифасини бажаради", — дейилади табрикда.

 

Тоқаевнинг сўзларига кўра, ҳозирда ҳарбийлар "ўз ватанлари осойишталигини қўриқлаб, ота-боболарининг анъаналарини давом эттирмоқда".

 

“Уларнинг олижаноб хизмати навқирон авлод учун илҳомлантирувчи ибратдир. Барча аскар ва офицерларга қасамёдга содиқлиги, хизмат бурчини сидқидилдан адо этгани учун миннатдорчилик билдираман. Мард армиямиз қудрати мустаҳкам, давлатимиз пойдевори доимо мустаҳкам бўлсин!..

 

Биз барча масалаларни БМТ Низомига мувофиқ халқаро ҳуқуқ доирасида ҳал қилиш керак, деб ҳисоблаймиз. Бироқ, замон ҳар куни ўзгариб бормоқда. Давлатлар ўз манфаатларини ҳимоя қилиш учун кўпинча куч ишлатган. Дунёда оммавий қуролланиш авж олган. «Душман йўқ дема, у жардан нарида» деган нақл бор. «Ҳозирги оғир даврда армиянинг аҳамияти ошди", — деган Қозоғистон  президенти.