Россия бош вазири Хитойга боради
Ташриф давомида Россия ва Хитой ўртасидаги ҳамкорлик масаласи муҳокама қилинади.
«Хитой ва Россия ўртасидаги ҳамкорлик кучли ва катта салоҳиятга эга», — деди Хитой Ташқи ишлар вазирлиги расмий вакили Ван Венбин Россия бош вазири Михаил Мишустиннинг Хитойга ташрифи арафасида.
Унинг қайд этишича, Мишустиннинг Хитойга ташрифи давомида томонлар «амалий ҳамкорлик мавзуси ва томонларни қизиқтирган масалалар юзасидан чуқур фикр алмашишади».
Ван Венбиннинг қўшимча қилишича, Пекин Россия бош вазирининг Хитойга ташрифи «жаҳон иқтисодиётининг тикланишига кучли туртки беришига» умид қилмоқда.
Аввалроқ Россия ҳукумати матбуот хизмати Мишустин 23-24 май кунлари Пекин ва Шанхайга ташриф буюришини маълум қилганди. Хитой Халқ Республикаси Раиси Си Цзиньпин ва Хитой Халқ Республикаси Давлат Кенгаши Бош вазири Ли Цянь билан музокараларда у саноат, энергетика, транспорт ва қишлоқ хўжалиги соҳаларида ҳамкорликни муҳокама қилади.
