Андижонда учта машина ЙТҲга учради
Ҳодиса тезлик меъёрларининг бузилиши сабаб юз берган.
Бугун, 21 май куни Андижон вилояти Қўрғонтепа туманида учта автомашина иштирокида йўл-ьранспорт ҳодисаси содир бўлди. Ҳолат юзасидан вилоят ИИБ ЙҲХБ маълумот берди.
Ҳолат соат 06:00 ларда Қўрғонтепа тумани “Қўтқар” МФЙ худудида юз берган. 1995 йилда туғилган М.Х.га тегишли Жигули–0111 русумли автомашинаси, 1996 йилда туғилган А.О.га тегишли Spark хамда 1976 йилда туғилган М.Р.га тегишли Нива–2121 русумли автомашиналар ҳайдовчилари тезлик меъёрларига ва оралиқ масофани сақлаш қоидаларига амал қилмасдан бошқарувни йўқотишган ва бир-бирлари билан тўқнашган.
ЙТҲ оқибатида транспорт воситалари техник шикастланган, тан жароҳати олганлар йўқ.
Мазкур ҳолат юзасидан Қўрғонтепа тумани ИИБ ЖХХ ЙҲХГ ходимлари томонидан терговга қадар текширув олиб борилмоқда.
