Туркияда президентлик сайловининг 2-босқичи бошланди
Унда 60 миллион нафардан ортиқ сайловчи иштирок этади.
Бугун, 28 май куни Туркияда маҳаллий вақт билан соат 08:00 да президентлик сайловининг иккинчи босқичида овоз бериш учун сайлов участкалари очилди.
Мамлакат бўйича 191 мингдан ортиқ сайлов қутилари ўрнатилган. Сайловчилар сони 60 миллион кишидан ошади.
14 май куни бўлиб ўтган овоз беришнинг биринчи босқичи натижаларига кўра, номзодлардан ҳеч бири 50 фоиз овоз тўплай олмаган. “Республика альянси”дан номзод, амалдаги президент Ражаб Тойиб Эрдоған (49,52 фоиз овоз) ва “Халқ иттифоқи”дан номзод Кемал Қиличдорўғли (44,88 фоиз овоз) иккинчи турга чиқиш ҳуқуқини қўлга киритган.
Биринчи турда 5,17 фоиз овоз олган Ата альянсидан президентликка собиқ номзод Синан Ўған иккинчи турда тарафдорларини Эрдоғанни қўллаб-қувватлашга чақирди.
Овозларни ҳисоблаш сайлов участкалари ёпилганидан сўнг дарҳол, маҳаллий вақт билан соат 17:00 да бошланади.
Хорижда яшаётган Туркия фуқаролари учун овоз бериш 24 май куни якунланди. 73 мамлакатда жами 3,5 миллион сайловчи овоз берди.
