Босфор ва Дарданелл бўғозидан ўтиш нархи ошади
Янги тартиб жорий қилингач, мамлакатнинг айни йўналишдаги даромади йилига 900 миллион долларга етади.
Туркия 1 июлдан бошлаб Босфор ва Дарданелл бўғозидан ўтаётган кемалар учун тўлов миқдорини камида саккиз фоиз оширади. Бу ҳақда «Айдинлик» газетаси мамлакат Транспорт ва инфратузилма вазирлиги ҳузуридаги Денгиз ишлари бош бошқармаси қарорига таяниб хабар берди.
Ҳукумат ўтган йил октябрда кемаларнинг Қора денгизга ўтиши учун йиғимни беш карра оширган. Тўлов 1936 йил Монтре конвенциясида белгиланган олтин франк қийматида амалга ошириб келинади.
«Монтре конвенциясига кўра, олтин франк қийматида солиқ коэффициенти ва Туркия портларига кирмай ўтаётган кемалардан олинадиган йиғим 1 июлдан 8,3 фоиз, яъни 4,42 доллар оширилади», — дейилади хабарда.
Янги тартиб жорий қилингач, мамлакатнинг айни йўналишдаги даромади йилига 900 миллион долларга етади.
Газета аниқлик киритишича, Монтре конвенцияси имзоланаётганда олтин франк 0,8 долларга тенг эди. Ўтган йил октябрда эса бу қиймат 4,08 долларга чиқди.
Монтре конвенциясига кўра, савдо кемалари тинч ва ҳарбий вазиятда Босфор ва Дарданелл бўғози орқали эркин ҳаракат қилиши мумкин. Ҳужжатга кўра, Қора денгизга туташ бўлмаган давлатларнинг ҳарбий кемалари ушбу денгизда уч ҳафтадан ортиқ қолмаслиги керак. Фавқулодда вазиятларда Туркия жанговар кемаларни Босфор ва Дарданелл бўғозидан ўтказмаслиги мумкин.
