Шавкат Мирзиёев Римда расмий кутиб олинди
Шундан сўнг давлат раҳбарлари учрашуви бошланди.
Бугун, 8 июнь куни Италия Республикаси Президентининг қароргоҳи – Рим шаҳридаги Квиринал саройида расмий ташриф билан ушбу мамлакатда бўлиб турган Ўзбекистон Республикаси Президенти Шавкат Мирзиёевни расмий кутиб олиш маросими бўлиб ўтди.
Сарой олдидаги майдонда олий мартабали меҳмон шарафига фахрий қоровул ҳамда отлиқ гвардия аскарлари саф тортди. Квиринал саройининг минорасида Италия, Ўзбекистон ва Европа Иттифоқи байроқлари кўтарилди.
Давлат раҳбарини Италия Республикаси Президенти Сержо Маттарелла кутиб олди.
Ҳарбий оркестр икки мамлакат миллий мадҳияларини ижро этди. Фахрий қоровул бошлиғи давлат раҳбарига рапорт берди.
Президентлар фахрий қоровул сафи олдидан ўтиб, расмий делегациялар аъзоларини қутладилар.
Биргаликда суратга тушиш маросимидан сўнг давлат раҳбарларининг икки томонлама учрашуви бошланди.
