«Вагнер» Ростовдаги ҳарбий объектлар устидан назорат ўрнатди
«Вагнер» раҳбари Пригожин Ростов шаҳрини блоклаб, Москвагача бормоқчилигни маълум қилган. Шунингдек, Путин яқин бир неча соат ичида россияликларга мурожаат қилиши кутилмоқда
«Вагнер» хусусий ҳарбий компанияси раҳбари Евгений Пригожин Ростовдаги барча ҳарбий объектларни, шу жумладан аэродром ва Жанубий ҳарбий округ штаб-квартираси ХҲК томонидан назоратга олинганини маълум қилди.
Унинг сўзларига кўра, Бош штаб бошлиғи вагнерчилар штаб-квартира биносига яқинлашаётганини билгач, бу ердан қочиб кетган. Шунингдек, Пригожин жанубий ҳарбий округи бош қароргоҳида ҳарбийлар қуршовида мудофаа вазирининг ўринбосари Юнус-Бек Евкуров ва бир кун аввал «Вагнер»ни тўхташга чақирган генерал Владимир Алексеевлар билан мулоқот қилди.
«Биз бу ерга келдик. Сабаби Бош штаб бошлиғи Герасимов ва Шойгуни қўлга киритмоқчимиз. Улар йўқолгунча биз шу ердамиз, Ростов шаҳрини блоклаб, Москвага кетяпмиз», - деди Пригожин.
Москвада аксилтеррор тадбирлари олиб борилмоқда, Москва мери Сергей Собянин маълум қилишича, йўлларда қўшимча назорат жорий қилинган, шунингдек, оммавий тадбирлар ўтказилиши чекланиши мумкин. Москва вилоятида ҳам худди Москвадаги каби хавфсизлик чоралари кучайтирилди, айни пайтда «антитеррор тадбирлари» олиб борилмоқда. Айни пайтда Ростов ва Воронеж вилоятларида барча оммавий тадбирлар бекор қилинди.
Бундан ташқари, ижтимоий тармоқларда хавфсизлик кучлари Санкт-Петербургда жойлашган «Вагнер» биносида тинтув ўтказаётгани акс этган видеолар тарқалмоқда.
Шунингдек, «РИА Новости»нинг хабар беришича, Россия президенти Владимир Путин яқин соатлар ичида россияликларга мурожаат қилиши кутилмоқда.
