«Путин йиртқич яратди ва у охири ўзини тишлади» — Жозеп Боррел
Европа дипломатияси раҳбари «Вагнер» ҳақида гапирди.
«Вагнер» асосчиси Евгений Пригожиннинг сўнгги исёни Россиянинг заифлиги ва хавфлилигини кўрсатди, деб ёзади Европа Иттифоқи дипломатияси раҳбари Жосеп Боррел ўз блогида. Унинг фикрича, Украинага қарши ҳарбий ҳаракатлар Россия президенти Владимир Путин режимини аввал ўйлагандан ҳам кўпроқ заифлаштирган.
«Путин йиртқич ҳайвон яратди, энди эса ўша йиртқич ҳайвон уни тишлаб олди. Давлат томонидан молиялаштириладиган ёлланма аскарлар гуруҳи мунтазам давлат армиясига қарата ўт очгани Россияси патологияси қай даражада эканлигини кўрсатади», - деди Боррел.
Шунингдек, у Беларусдаги воқеаларни диққат билан кузатишга чақирди. Таъкидлашича, Пригожин жангариларни у ерга кўчириши хавотирли. Шу билан бирга, дипломат Путин ўз ҳокимиятига зарба берганини, бу эса келажак учун ёмон оқибатларга олиб келишини қўшимча қилди.
