Путиннинг августда Туркияга ташрифи кутилмоқда
Бу ҳақда Эрдоған Зеленский билан ўтказилган қўшма матбуот анжумани чоғида маълум қилди.
Туркия етакчиси Ражаб Тоййиб Эрдоған Украина Президенти Владимир Зеленский билан қўшма матбуот анжумани чоғида Россия Президенти Владимир Путиннинг август ойида расмий ташрифини кутаётганини айтди.
Эрдоған Кремль раҳбари билан муҳокама қилишни режалаштираётган асосий мавзулар қаторида Россия ва Украина ўртасидаги ғалла келишуви ва асирлар алмашинуви ҳам бор.
"Биз ҳозир Россия билан бу масалани муҳокама қилмоқдамиз. Келаси ой эса Путин Туркияга ташриф буюради ва бу мавзу ҳақида яна юзма-юз гаплашиш имконияти бўлади", — деди Туркия Президенти.
Шунингдек, у Туркия “дон келишуви”ни узайтириш устида иш олиб бораётганини ва унинг амал қилиш муддатини икки йилга узайтириш учун барча саъй-ҳаракатларини амалга ошираётганини таъкидлади.
Туркия Президенти, шунингдек, Украинанинг Шимолий Атлантика иттифоқига киришини қўллаб-қувватлашини айтди.
