Эрдоған Байденга президентлик сайловида омад тилади
НАТО саммитида икки етакчи ўртасида учрашув бўлиб ўтди.
Туркия етакчиси Ражаб Тоййиб Эрдоған ва АҚШ президенти Жо Байден Вилнюсдаги НАТО саммитининг биринчи кунида учрашув ўтказди. Учрашув 1 соат 15 дақиқа давом этган.
«Раҳбарлар икки томонлама ҳамкорликни мустаҳкамлаш борасидаги саъй-ҳаракатларни муҳокама қилдилар, стратегик механизмдаги муҳокамаларнинг сўнгги босқичини олқишладилар ҳамда мудофаа ва иқтисодий устуворликлар юзасидан фикр алмашдилар», — дейилади Оқ уй матбуот хизмати хабарида.
Таъкидланишича, улар, шунингдек, умумий манфаатларга эга бўлган минтақавий масалалар, жумладан, Украинани қўллаб-қувватлашни давом эттириш ва Эгей денгизида барқарорликни сақлашни ҳам муҳокама қилган.
Ўз навбатида, «Анадолу» агентлигининг хабар беришича, Туркия президенти АҚШ раҳбари билан учрашишдан олдин «АҚШ билан давлат раҳбарлари даражасида маслаҳатлашувлар ўтказиш вақти келганини» айтган.
«Бугун мен НАТО майдонларида бўлиб ўтган ушбу учрашувни бу йўналишдаги биринчи қадам деб биламан. Олдинги учрашувларимиз қандайдир илиқлик бахш этган эди, энди эса биз янги жараённи бошлаяпмиз», — деб қўшимча қилди Эрдоған.
У шунингдек, Байденга қайта сайланишида муваффақият тилади.
