БМТ Қуръон ва муқаддас китобларни ёқиб юборишни қораловчи резолюция қабул қилди
28 давлат, шу жумладан, Ўзбекистон ҳам БМТнинг бу резолюциясини ёқлаб овоз берган.
Бирлашган Миллатлар Ташкилотининг Инсон ҳуқуқлари бўйича кенгаши овоз бериш натижаларига кўра, муқаддас китобларни ёқиш билан боғлиқ ҳаракатларни қораловчи резолюцияни қабул қилди.
"Кенгаш сўнгги пайтларда Қуръони каримнинг оммавий ва қасддан таҳқирланишини қоралайди ва қатъиян рад этади ҳамда ушбу диний нафрат ҳаракатлари учун жавобгарларни давлатларнинг халқаро инсон ҳуқуқларидан келиб чиқадиган мажбуриятларига мувофиқ жавобгарликка тортиш зарурлигини таъкидлайди", — дейилади ҳужжатда.
Резолюцияни 28 давлат вакиллари ёқлаб, 12 таси қарши, 7 нафар делегат бетараф овоз берди.
Бирлашган Миллатлар Ташкилоти органи давлатларни диний нафрат сўзлари ёки "камситиш, адоват ва зўравонликни қўзғатувчи" ҳаракатлар учун жавобгарликка тортилишига тўсқинлик қилиши мумкин бўлган бўшлиқларни аниқлаш учун ўзларининг миллий қонунлари, сиёсатлари ва қонунларни қўллаш тизимини қайта кўриб чиқишга чақирмоқда.
Кенгаш БМТнинг Инсон ҳуқуқлари бўйича Олий комиссари ва Инсон ҳуқуқлари бўйича кенгашнинг барча тегишли махсус тартиб-қоидаларини ўз ваколатлари доирасида диний адоватни қўзғатишни, жумладан, муқаддас китобларни таҳқирлаш ҳаракатларини қоралашга чақирди.
Июнь ойи охирида ироқлик қочқин Салван Момика Стокголмда Қурбон ҳайитини нишонлаш чоғида Қуръон мусҳафини ёқиб юборган эди. Қуръоннинг ёқиб юборилиши мусулмон оламининг кескин муносабатига сабаб бўлди.
Воқеа Жазоир, Афғонистон, Миср, Индонезия, Ливан, Сурия, Туркия, Ўзбекистон, Араб давлатлари лигаси бош котиби Аҳмад Абул Ғойт ва Форс кўрфази араб давлатлари ҳамкорлик кенгаши бош котиби Жассим ал-Будайве томонидан қораланди. Резолюцияни қўллаб-қувватлаган давлатлар орасида Ўзбекистон ҳам бор.
Ҳужжатга 12 давлат, жумладан, АҚШ, Буюк Британия, Германия, Литва ва Бельгия қарши овоз берган.
