Тошкент вилоятидаги туғуруқхонада она ва бола вафот этди

 

Тошкент вилояти Нурафшон шаҳридаги туғуруқхонада ҳомиладор аёл чақалоғи билан вафот этди. ССВ ҳолат юзасидан маълумот берди. Аниқланишича, 14 июль соат 06:45 да Нурафшон шаҳар тиббиёт бирлашмасининг туғуруқ бўлимига Ўртачирчиқ туманияшовчи 1993 йил туғилган фуқаро мурожаат қилган.

 

Бемор муассасага олиб келинганида аҳволи ўта оғир, териси рангпар, совуқ тер босган, артериал қон босими 70/40 мм симоб устунига тенг, тана ҳарорати 39,5 даража, тананинг шиллиқ қаватлари кўкимтир рангда, карахт ва саволларга аниқ жавоб бера олмайдиган ҳолатда бўлган.

 

Натижада қабул вақтида унга «Ҳомиладорлик-2», 38 ҳафта туғуруқ, сепсис. I-II даражали септик шок» дастлабки ташхиси қўйилиб, зудлик билан реанимация бўлимига ётқизилган. Шундан сўнг навбатчи бригада акушер-гинекологлари ҳамда анестезиолог-реаниматолог томонидан барча зарур реанимацион муолажалар амалга оширишга киришилган.

 

Дастлаб икки томонлама периферик вена, кейинчалик марказий вена катетерланиб, марказий веноз босим паст бўлганлиги учун шокка қарши, юрак-қон томир, нафас олиш тизимини қўллаб-қувватловчи тезкор чора-тадбирлар ўтказилган. Шунингдек, бемор ўпканинг сунъий вентиляциясига ўтказилган. Бироқ марказий вена орқали бажарилган массив инфузион муолажалар ва жадал реанимацион терапияга қарамай, унинг гемодинамикаси тикланмаган.

 

Оқибатда 14 июль соат 07:30 да беморда клиник ўлим ҳолати қайд этилган. Навбатчи анестезиолог-реаниматолог шифокорлар томонидан юрак-ўпка реанимацияси 40 дақиқа давомида олиб борилди, бироқ юрак фаолияти тикланмаган. Оқибатда соат 08:10 да беморда биологик ўлим кузатилди.

 

Ушбу ҳолат юзасидан суд-тиббий экспертизаси тайинланди.