Бухорода браконьер экология инспекторига ўқ узди
Оқибатда Экология бўлими бошлиғи яраланган. Гумонланувчи эса воқеа жойидан яширинган.
Экология, атроф-муҳитни муҳофаза қилиш ва иқлим ўзгариши вазирлигининг хабар беришича, Бухоро вилояти, Қоровулбозор туманида рейд тадбири олиб бораётган туман Экология бўлими бошлиғи, инспектор Мирали Ҳожиев хизмат вақтида яраланди.
Аниқланишича, инспектор Қоровулбозор ҳудудида ноқонуний ов қилинаётганидан хабар топган. Шундан сўнг ҳолатга чек қўйиш мақсадида воқеа жойига борганида браконьер томонидан ўқ узилиши натижасида қўлидан яраланган. Браконьер эса воқеа жойидан яширинган.
Инспекторга тез тиббий ёрдам кўрсатилган. Ҳозирда унинг аҳволи яхши. Браконьерни қўлга олиш чоралари кўрилмоқда.
