Сурхондарёда тожик кавраги ўсимлигини кесган шахсларга нисбатан жиноят иши қўзғатилди
Табиий ҳолда ўсувчи ўсимлик шира олиш мақсадида кесилган
Бош прокуратура маълумотларига кўра, Сурхондарё вилоятининг Боботоғ тизмаси ҳудудида фаолият юритувчи «У.О.М.А.» МЧЖ қўшма корхонасига бириктирилган тоғ ва тоғ олди ҳудудларида табиий ҳолда ўсувчи тожик кавраги ўсимлигининг 2 421 таси картонлаш орқали димланган ва 81 таси эса ширасини олиш мақсадида кесилгани аниқланган.
Мазкур ҳолат юзасидан жамиятнинг масъул шахсларига нисбатан Жиноят кодексининг 192-11-моддаси (Нодавлат тижорат ташкилотида ёки бошқа нодавлат ташкилотида мансабдор шахслар томонидан ўз ваколатларини суиистеъмол қилиш) ва 202-моддаси (Ҳайвонот ёки ўсимлик дунёсидан фойдаланиш тартибини бузиш) билан жиноят иши қўзғатилди.
Қайд этилишича, Бош прокуратура томонидан мазкур жиноят иши тергови устидан назорат ўрнатилган.
Маълумот учун, Президентнинг «Яйловларни муҳофаза қилиш ва улардан оқилона фойдаланишни таъминлашга доир қўшимча чора-тадбирлар тўғрисида»ги фармонида Ўзбекистон Қизил китобига киритилган тожик кавраги ўсимлигининг табиий популяцияси, такрор кўпайиши ва қайта тикланишини таъминлаш мақсадида ушбу ўсимликдан фойдаланишга уч йил муддатга мораторий эълон қилинган.
