АҚШ Қирғизистонга қарши санкция жорий қилишга тайёрланмоқда
Санкциялар ҳақидаги қарор америкалик ва европалик дипломатларнинг Бишкекка бир неча ойлик самарасиз ташрифлари ортидан қабул қилинган.
АҚШ бир ҳафта ичида Қирғизистонга қарши санкциялар эълон қилиши мумкин, дея хабар берди The Washington Post. Газетага кўра, Вашингтон Бишкекни Россияга Хитой, Европа ва Жанубий Кореядан санкциялар рўйхатига киритилган товарларни етказиб беришда айбламоқда. Улар орасида дронлар, оптик нишонлар ва яримўтказгичлар бор.
Таъкидланишича, санкциялар ҳақидаги қарор америкалик ва европалик дипломатларнинг Бишкекка «бир неча ойлик самарасиз ташрифлари» ортидан қабул қилинган.
«Қирғизистон, гарчи бошқалар билан солиштирганда кичик давлат бўлсада, барча омиллар бир вақтнинг ўзида (санкциялардан қочиш учун) йўл қўйиб бўлмайдиган қулай шарт-шароитларни яратаётганига яққол мисолдир», - деди WP манбаси.
Хабарда келтирилишича, мисол тариқасида Қирғизистон компаниялари февраль-март ойларида Хитой ва Жанубий Кореядан минглаб долларга «сезгир электроника» сотиб олган. Худди шу даврда Қирғизистондан Россияга тахминан бир хил миқдордаги электроника экспорт қилингани келтирилган. Вашингтонга кўра, харидорларнинг аксарияти Россия мудофаа саноатининг етказиб берувчилари.
Қайд этилишича, 2022 йилда Қирғизистондан Россияга экспорт ҳажми 250 фоизга ошган.
Қирғизистоннинг АҚШдаги элчихонаси WP нашрига Бишкек халқаро меъёрларга амал қилишини, контрабанда ва бошқа турдаги ноқонуний савдони бостиришини айтди. Дипломатик миссия Россия билан товар айирбошлашнинг кескин ўсишини қисман товарларни кузатиш тизимини такомиллаштириш билан боғлади. Элчихона, шунингдек, реал иқтисодий контекст ҳисобга олинмаганини таъкидлади, чунки Россия ва Қирғизистон ЕОИИ аъзолари ва Россия мамлакатнинг асосий савдо шерикларидан бири ҳисобланади.
