Ўзбекистонда умумий қуввати 15 гигаваттдан ортиқ қуёш ва шамол станциялари барпо этилади
Шавкат Мирзиёев Сергелига борди
Шавкат Мирзиёев 21 июль куни Тошкентнинг Сергели туманидаги ишлаб чиқариш корхонаси фаолияти билан танишди.
Президент матбуот хизмати маълумотларига кўра, жорий йилнинг май ойида ишга туширилган ушбу корхонада 350 дан ортиқ турдаги, йилига 30 минг тонна алюмин профиль ишлаб чиқарилиши мумкин. Давлат раҳбари бу ердаги иш жараёни ва маҳсулотларни кўздан кечирди.
«Дунёдаги етакчи компаниялар билан биргаликда умумий қуввати 15 гигаваттдан ортиқ қуёш ва шамол станцияларини барпо этмоқчимиз. ‘Яшил’ энергетика - маҳаллий ишлаб чиқарувчиларимиз учун тайёр бозор, катта имконият. Фақат асосий талаб — сифат», - деди Президент.
Корхонага Италия, Жанубий Корея ва Туркиядан энг замонавий ускуна ва жиҳозлар келтириб ўрнатилган. Натижада 400 та янги иш ўрни яратилган. Сентябрь ойидан қўшимча янги 130 турдаги алюмин профиллар ишлаб чиқариш йўлга қўйилади. Қайд этилишича, импорт ўрнини босишдан ташқари, маҳсулотларнинг бир қисмини экспортга йўналтириш режалаштирилган.
