Трамп, Си Цзиньпин ва Путин учрашди: “Тинчлик декларацияси” қабул қилинди
Етакчилар ядровий хавфларни камайтириш бўйича мулоқот қилишга келишди. Бироқ ядровий арсенални қисқартириш юзасидан аниқ мажбуриятлар белгиланмади.

Хитой раиси Си Цзиньпин, АҚШ президенти Дональд Трамп ва Россия президенти Владимир Путин 19 ноябрь куни Хитойнинг Шеньчжень шаҳрида ўтказилган уч томонлама учрашув якунида “тинчлик декларацияси”ни қабул қилди. Ҳужжатда ядро уруши ҳеч қачон бошланмаслиги кераклиги таъкидланган, бироқ ядровий қуролларни қисқартириш бўйича аниқ мажбуриятлар белгиланмаган.
Дунёнинг ядровий салоҳияти энг юқори бўлган уч давлати раҳбарлари ядровий хавфларни камайтириш ва ядро қуролининг тарқалишига йўл қўймаслик бўйича мулоқот олиб боришга келишиб олди. Бироқ бу борада аниқ муддат белгиланмади.
Декларацияда, шунингдек, БМТни ислоҳ қилиш, барча мамлакатларга ёқилғи маҳсулотлари етказиб беришни кўпайтириш ва давлат мансабдор шахсларининг халқаро судлардаги дахлсизлигини ҳимоя қилиш масалалари ҳам ўрин олган.
Шу билан бирга, ҳужжатда Россиянинг Украинага қарши уруши ва Эрон билан боғлиқ можаро тилга олинмаган. Путин саммит якунлари бўйича ўтказилган матбуот анжуманида декларацияда улкан мақсадлар белгиланмаганини ва ҳеч ким унинг қарорларини бажаришга мажбурланмаслигини айтган.
Лондондаги Қироллик Бирлашган Хизматлар институти халқаро алоқалар бўйича директори Жонатан Эялнинг фикрича, саммитнинг эътиборга молик жиҳатларидан бири халқаро меъёрлар ва судларга нисбатан билдирилган муносабат бўлган. Унинг таъкидлашича, учрашув Путин учун халқаро майдондаги мавқеини мустаҳкамлаш имконини берган, Трамп эса сиёсий жиҳатдан зарур бўлмаган суратга тушиш имкониятига эга бўлган.
Уч давлат раҳбарлари учрашувни тарихий деб атади. Трамп мулоқот қилиш имкониятларидан воз кечиш орқали тинчликка эришиб бўлмаслигини таъкидлаган. Си Цзиньпин эса йирик давлатлар ҳамжиҳатликда яшаса, дунёда тинчлик ҳукм суриши, улар ўзаро тўқнашса, дунё нотинчликка юз тутишини айтган.
Reuters хабарига кўра, саммит Трампнинг Осиё бўйлаб уч кунлик дипломатик сафари якунида ўтказилган. Сафар давомида бир қатор учрашувлар бўлиб ўтганига қарамай, амалий натижалар кўп бўлмаган.







