Шавкат Мирзиёев Туркманистонга бориши кутилмоқда
Ашхободда Туркманистон, Ўзбекистон ва Тожикистон президентлари ўртасида саммит бўлиб ўтади
Ташқи ишлар вазирлиги маълумотларига кўра, 26 июль куни ташқи ишлар вазири Бахтиёр Саидов, Тожикистон ташқи ишлар вазири Сирожиддин Муҳриддин ва Туркманистон ташқи ишлар вазири Рашид Мередов ўртасида видеоконференалоқа шаклида музокаралар бўлиб ўтди.
Учрашувда жорий йил август ойида Ашхобод шаҳрида бўлиб ўтадиган Ўзбекистон, Тожикистон ва Туркманистон президентларининг саммитига тайёргарлик кўриш ва уни ўтказиш масалалари муҳокама қилинди.
Вазирлар бўлажак йиғилишнинг дастури лойиҳаси, кун тартиби, шунингдек,саммитнинг якуний ҳужжати лойиҳасини муҳокама қилдилар. Бундан ташқари, вазирлар минтақавий ҳамкорликнинг устувор жиҳатлари юзасидан ҳам фикр алмашган.
