Украина мудофаа вазири: Қрим кўпригига ҳужум давом этади
Аввалроқ Зеленский Қрим кўприги «йўқ қилиниши керак бўлган» нишон эканини таъкидлаганди.
Украина мудофаа вазири Алексей Резников Киев Қрим кўпригига зарба беришда давом этади, деди “CNN” эфирида кўприкни тўлиқ ишдан чиқариш режаси ҳақида берилган саволга жавоб бераркан.
17 июль куни тунда Украинанинг сув юзасида ҳаракатланадиган дронлари Қрим кўпригига ҳужум уюштирди. Оқибатда, икки киши ҳалок бўлган, автомобиль ҳаракатланадиган йўлак зарар кўрган.
Россия Президенти Владимир Путин ушбу ҳужум учун жавобгарлик Киев зиммасида эканини айтди. Унинг таъкидлашича, Қрим кўприги орқали ҳарбий юк, аллақачон, ташилмай қўйган.
"Рақибнинг логистика йўлагини вайрон қилиш мақбул тактика ҳисобланади, чунки қурол-аслаҳа, ёқилғи, озиқ-овқат ва бошқа зарур маҳсулотлар ташиш имкониятига чек қўйиш муҳим. Шунинг учун ҳам биз айни тактикадан фойдаланамиз", – деди Резников.
Аввалроқ Украина Президенти Владимир Зеленский ҳам Аспен институтида бўлиб ўтган хавфсизлик бўйича анжуманда Қрим кўприги “йўқ қилиниши керак бўлган” нишон эканини таъкидлаган.
