Блогер Олимжон Ҳайдаров тергов ҳибсхонасига жойлаштирилди
Қўқон шаҳар прокурорининг илтимосномасига асосан гумонланувчига нисбатан қамоққа олиш тарзидаги эҳтиёт чораси қўлланилган.
Аввалроқ фарғоналик блогер Олимжон Ҳайдаров товламачиликда гумонланиб қўлга олингани ҳақида хабар берилганди.
Олий суд матбуот хизматининг хабар беришича, 29 июль куни жиноят ишлари бўйича Қўқон шаҳар судида Қўқон шаҳар прокурорининг Жиноят кодексининг 165-моддаси (товламачилик) 2-қисми «б» бандида назарда тутилган жиноятни содир этганликда гумон қилинувчи ва Жиноят-процессуал кодексининг 227-моддаси (суриштирувчининг, терговчининг ёки прокурорнинг қарорига биноан ушлаб туриш) тартибида ушланган О. Х. (1989 йилда Россия Федерациясида туғилган, Ўзбекистон фуқароси, муқаддам судланмаган) га нисбатан қамоққа олиш тарзидаги эҳтиёт чорасини қўллаш тўғрисидаги илтимосномаси тақдим этилган ҳужжатлар билан кўриб чиқилди.
Қайд этилишича, суднинг 29 июлдаги ажрими билан Қўқон шаҳар прокурорининг илтимосномаси қаноатлантирилиб, гумонланувчига нисбатан қамоққа олиш тарзидаги эҳтиёт чораси қўлланилиб, қамоққа олиниши ва тергов ҳибсхонасига жойлаштирилиши белгиланган.
