Тошкентда йигит аёл бошқарувидаги машинани шикастлади
Ҳодисага қизнинг унга рад жавоби бергани сабаб бўлгани айтилмоқда.
Ижтимоий тармоқларда Тошкент шаҳрининг Юнусобод туманида йигит қиздан рад жавобини олгани учун унинг автомашинасига шикаст етказгани айтилган видео тарқалди. Ҳолат юзасидан шаҳар ИИББ ахборот хизмати расмий муносабат билдирди.
Қайд этилишича, 4 август куни тахминан соат 00:10 ларда Юнусобод тумани A.Temur кўчасида Собалт ҳайдовчи — 2002 йилда туғилган M.X. ҳамда Гентра русумли автомашина ҳайдовчиси — 1999 йилда туғилган D.T.lar орасида йўлда ўзаро келишмовчилик келиб чиққан. Келишмовчилик натижасида Собалт русумли автомашина ҳайдовчиси Гентра русумли автомашинага техник шикаст етказган.
“Мазкур ҳолат юзасидан Юнусобод тумани ИИО ФМБ томонидан терговга қадар текширув ўтказилмоқда. Натижаси бўйича қонуний қарор қабул қилиниши таъминланади”, — дейилади хабарда.
