Тожикистонда даҳшатли ЙТҲ оқибатида 10 киши ҳалок бўлган — видео
Юк машинаси бошқа енгил автомобиллар ва турар-жой биноларига бориб урилган.
Тожикистоннинг Кўлоб шаҳрида юк машинаси бошқа енгил автомобиллар ва турар-жой биноларига бориб урилган. 10 киши ҳалок бўлди, 14 киши жароҳат олиб касалхонага ётқизилди.
Ҳодиса 6 август куни кечқурун Душанбе-Кўлоб-Хороғ автомобиль йўлида содир бўлган. Автоҳалокатга тормознинг носозлиги сабаб бўлган. Президент ҳузуридаги Фавқулодда вазиятлар қўмитаси ТАСС агентлигига қурбонлар ва жароҳатланганлар сонини аниқлади.
Ҳолат юзасидан жиноий иш қўзғатилган. Ҳозирда мазкур ҳолат юзасидан дастлабки тергов ҳаракатлари олиб борилмоқда. Президент Имомали Раҳмон воқеа жойига Ички ишлар вазирлиги, Соғлиқни сақлаш вазирлиги, ҳукумат ҳузуридаги Фавқулодда вазиятлар қўмитаси раҳбарларини, Хатлон вилояти раисини жўнатди.
