Тошкентдаги “дом”да ёнғин юз берди
ФВБ ходимлари 20 кишини эвакуация қилган.
Тошкент шаҳрининг Мирзо Улуғбек туманидаги кўп қаватли уйда ёнғин юз берди. Ҳолат бўйича Фавқулодда вазиятлар вазирлиги маълумот берди.
Қайд этилишича, 6 август куни соат 18:59 да м.Улуғбек тумани “Бешкапа” МФЙ Буюк Ипак Йўли кўчасида жойлашган кўп қаватли уй хонадонларининг бирида ёнғин содир бўлаётганлиги тўғрисида ФВБга хабар тушган.
Шунга кўра, ёнғинга соат 19:06 да етиб борилиб, соат 19:25 да ўчирилган. Ёнғинни бартараф этишга 3 та ёнғин-қутқарув экипажи, 1 та автонарвон ва 1 та ёнғин-қутқарув отряди бўлинмаси жалб этилган.
Ёнғин натижасида 15 квадрат метр майдонда уй-жиҳозлари ёниб зарарланган. Ёнғин ўчириш жараёнида ушбу уй қаватларидан 20 нафар фуқаро қутқарувчилар томонидан хавфсиз жойга эвакуация қилинган.
Ҳодиса оқибатида тан жароҳати олган ва ҳалок бўлганлар йўқ.
