Европа компаниялари Украинадаги уруш бошланганидан бери 100 млрд евро йўқотди
Европа компаниялари уруш бошланганидан кейин ўз бизнесини сотиш, ёпиш ёки қисқартириш билан боғлиқ харажатларга дуч келган.
Россиянинг 2022 йил 24 февралдаги Украинага кенг кўламли бостириб кириши бошланганидан бери Европа компанияларининг Россиядаги фаолияти билан боғлиқ тўғридан-тўғри йўқотишлари камида 100 миллиард еврони ташкил этди. Бу ҳақда Financial Times 600 та энг йирик компаниянинг молиявий ҳисоботларига таяниб хабар бермоқда.
Нашрнинг ёзишича, Европанинг 176 компанияси ўз активларининг амортизацияси, «биржа билан боғлиқ харажатлар», шунингдек, бизнесни сотиш, ёпиш ёки қисқартириш билан боғлиқ харажатларга дуч келган.
Энг катта йўқотишлар энергетика корхоналари томонидан кўрилган деб ёзади FT. Хусусан, BP, Shell ва TotalEnergies жами 40,6 миллиард евро зарар кўрган. Бироқ экспертларнинг фикрича, улар нефть ва газ нархининг юқорилигидан зарар миқдорини фойда билан қоплашга муваффақ бўлишган.
Шунингдек, молиявий компаниялар, жумладан, банклар, суғурта ва инвестиция компаниялари ҳам катта зарар кўрди — улар 17 ярим миллиард еврога яқин йўқотишган. Бундан ташқари, автомобиль ишлаб чиқарувчилари 13,6 миллиард евро миқдорида зарар кўрган.
Газетанинг ёзишича, Европа компаниялари орасида энг кўп зарар кўрган Британия компаниялари бўлиб, улар 30 миллиард евродан ортиқ зарар кўрган. Иккинчи ва учинчи ўринларни биргаликда 40 миллиарддан ортиқ йўқотган немис ва француз фирмалари эгаллади. Шу билан бирга, Италия, Ирландия ва Дания компаниялари ҳам катта йўқотишларга учраган.
