АҚШда шаҳар мери сувдан кокаин «овлади»
У балиқ тутаётганда қармоққа гиёҳванд модда илинган.
Флорида штатининг Тампа шаҳри мери Жейн Кастор оиласи билан қайиқда балиқ тутаётганда 30 килограммдан ортиқ кокаинни сувдан чиқариб олди.
Илгари Кастор полицияда ишлагани учун у пакетларда гиёҳванд моддалар борлигини дарҳол англади. У Соҳил хавфсизлик хизматига қўнғироқ қилиб, бу ҳақида хабар берди. Гиёҳванд модда кимга тегишли экани ва сув остига қандай тушиб қолгани номаълум.
Маҳаллий ОАВнинг ёзишича, гиёҳванд моддалардан ташқари, мер оиласи билан 60 га яқин балиқ тутган.
Эслатиб ўтамиз, аввалроқ Перудан келган йўловчи Москвага кокаин қўшилган конфет олиб ўтмоқчи бўлган эди. Аёлнинг сўзларига кўра, у дўстларига совға сифатида лолипоп сотиб олган ва улар таркибида наркотик моддаси борлигини билмаган.
