Хоразмда директор ўқитувчиларга мактабни тозалаттирди
Шундан сўнг мактаб раҳбари жазога тортилган.
Ижтимоий тармоқларда Хоразм вилояти Янгибозор туманидаги 28-мактабда ўқитувчилар мактабни тозалаш ишларига жалб қилингани ҳақида хабар тарқалди. Ҳолат юзасидан Камбағалликни қисқартириш ва бандлик вазирлиги муносабат билдирди.
Қайд этилишича, ташкилот раҳбари ходимларни Меҳнат кодексининг 115-моддаси (Иш вақтининг нормал муддати)га зид равишда меҳнат шартномасида кўрсатилмаган, ўз хизмат вазифалари доирасига кирмайдиган ишларга жалб қилгани аниқланган.
Шу сабабли унга нисбатан Маъмурий жавобгарлик тўғрисидаги кодекснинг 49-моддаси 1-қисми (Мансабдор шахс томонидан меҳнат ва меҳнатни муҳофаза қилиш тўғрисидаги қонунчиликни бузиш) билан маъмурий жарима қўлланган. Бунда жарима миқдори базавий ҳисоблаш миқдори (330 минг сўм)нинг 5 бараваридан 10 бараваригача этиб кўрсатилган.
