Байден аланга ичида қолган Гавайига бориши мумкин
Оролда офат қурбонлари сони 100 га яқинлашди.
АҚШ президенти Жо Байден ёнғинларда камида 93 киши ҳалок бўлган Мауи оролига ташриф буюриши мумкинлигини айтди.
“Биз буни кўриб чиқяпмиз”, – дея жавоб берди Америка раҳбари журналистнинг Мауига сафари эҳтимоли ҳақидаги саволига. Байден дам олиш кунларини Делавер штатидаги Рехобот-Бичда ўтказмоқда. Офат зонасига қачон бориши эса ҳозирча номаълум.
Гавайи губернатори Жон Грин шанба куни оролдаги ёнғинлар Қўшма Штатлардаги энг ҳалокатли ёнғинга айланганини айтди. Мауида ўрмон ёнғинлари 9 август куни бошланган эди. Кучли шамол туфайли ёнғин тезда Лахайна сайёҳлик шаҳарчасига ўтган.
АҚШ Фавқулодда вазиятларни бошқариш федерал агентлиги ҳисоб-китобларига кўра, оролдаги ёнғинлардан кейин тиклаш ишлари тахминан 5,52 миллиард долларга тушади.
АҚШ Конгресси Вакиллар палатаси аъзоси Маржори Тейлор-Грин аввалроқ Вашингтон маъмурияти Гавайини қўллаб-қувватлаш зарурлигини унутиб, Украинага ҳарбий ёрдам учун катта маблағ ажратилаётганини танқид қилган эди.
