Тошкентда йўл ўтказгич устунлари қулаши ортидан жиноят иши қўзғатилди
Ҳозирда 3 нафар мансабдор процессуал тартибда ушланган.
Аввалроқ Тошкент шаҳрининг Яккасарой туманида қурилаётган йўл ўтказгичларнинг 5 та устуни қулаб тушгани хабар қилинганди. Ҳолат юзасидан Транспорт прокуратураси қўшимча маълумот берди.
Қайд этилишича, узунлиги 42 метрлик 5 дона йўл ўтказгич устуни (балкалар) қулаб тушган ва 2 млрд 760 млн сўмлик зарар етказилган.
Мазкур ҳолат юзасидан Транспорт прокуратураси томонидан Жиноят кодексининг тегишли моддалари билан жиноят иши қўзғатилиб, 3 нафар мансабдор шахслар гумон қилинувчи тариқасида ишга жалб қилиниб, процессуал тартибда ушланган.
Ҳозирда жиноят иши юзасидан дастлабки тергов ҳаракатлари олиб борилмоқда.
