Боррел Россияни «ядро қуролига эга ёқилғи қуйиш шохобчаси» деб атади

 

Россия иқтисодиёти ҳақиқий геосиёсий ўйинчилар иқтисодига нисбатан жуда кичик, мамлакат кўпроқ «эгасида атом бомбаси бор ёқилғи қуйиш шохобчаси»га ўхшайди. Бу ҳақда Европа Иттифоқининг ташқи ишлар бўйича олий вакили Жосеп Боррел El Pais газетасига берган интервьюсида маълум қилди.

 

Европа Иттифоқи ва Хитой ўртасидаги муносабатлар ҳақида гапирар экан, Боррел Пекин Москвадан фарқли ўлароқ, бугунги кунда бироз келишмовчиликлар мавжуд бўлган «ҳақиқий геосиёсий ўйинчи» эканини таъкидлади.

 

«Биз халқаро тизимнинг қутбланишига ҳисса қўшишдан манфаатдор эмасмиз, бу икки қутбли дунёга олиб келади ва иккита рақобатлашувчи технологик тизимнинг пайдо бўлишига сабаб бўлиб, ҳаммани у ёки бу бирини танлашга мажбур қилади. Шубҳасиз, биз Қўшма Штатларга яқинмиз, аммо бу бизнинг ўз манфаатларимиз йўқ дегани эмас», — дея қўшимча қилди Европа дипломатияси раҳбари.

 

Боррел, шунингдек, Украинага ҳарбий ёрдам беришдан бош тортиш тинчликка олиб келмаслигини айтди. Европа Иттифоқи дипломатияси раҳбарининг қўшимча қилишича, Европа тинчлик музокараларига эришиш учун барча имкониятларни ишга солмоқда. Унинг таъкидлашича, агар Украинадаги можаро бўлмаганида, Киевнинг Европа Иттифоқига қўшилиши йилларга чўзилган бўларди.

 

Шу билан бирга, Боррел Украинанинг ЕИга аъзо бўлиш истиқболини «жиддий муаммо» деб атади: «Агар у эртага аъзо бўлса, у ягона маблағ олувчига айланади. Қолганларнинг ҳаммаси мамлакат сармоядорига айланади».

 

Маълумот учун, республикачи сенатор Жон Маккейн илк бор 2014 йилда Украина шарқида можаро бошланганидан кейин Россияни «ёқилғи қуйиш шохобчалари мамлакати» деб атаган. Шундан сўнг, 2020 йилда Путин Россия «ёнилғи қуйиш шохобчалари мамлакати» эмаслигини таъкидлаганди. Бироқ унинг қўшимча қилишича, Россия бюджетининг 70 фоизи бўлмаса ҳам катта қисми нефть ва газ даромадлари ҳисобига шаклланади.