Тошкентда автобусларнинг «заправка»ларда навбатда туриб қолаётгани бўйича маълумот берилди
«Тошшаҳартрансхизмат»нинг маълум қилишича, айрим ёқилғи қуйиш шахобчалари ёпилганлиги сабабли навбатлар юзага келган.
Ижтимоий тармоқларда автобуслар ёқилғи қуйиш шахобчаларида навбатда туриб қолганлиги акс этган видеолар тарқалди. Мазкур ҳолат юзасидан «Тошшаҳартрансхизмат» расмий маълумот берди.
Унда қайд этилишича, айрим ёқилғи қуйиш шахобчалари ёпилганлиги сабабли «Тошшаҳартрансхизмат» АЖ тасарруфидаги автобусларни табиий газ билан таъминлаш учун бошқа ёқилғи қуйиш шохобчаларига юборилган. Бу эса ўз навбатида ёқилғи қуйиш шохобчаларида навбатлар пайдо бўлишига олиб келган.
Таъкидланишича, мазкур масалани ҳал этиш мақсадида, Тошкент шаҳар ҳокимлигида «Ҳудудгазтаъминот” АЖ ва «Тошшаҳартрансхизмат» АЖ иштирокида тезкор ишчи гуруҳ тузилган.
Унга кўра, ҳозирда пойтахтдаги мавжуд метан «заправка»ларида «Тошшаҳартрансхизмат» АЖ тасарруфидаги автобуслар учун қўшимча ёқилғи қуйиш станциялари ажратилган ҳамда табиий газда ҳаракатланадиган автобусларнинг узлуксиз ишлаши бўйича барча чора-тадбирлар кўрилмоқда.
