Тошкентда бепул автобус йўналиши йўлга қўйилди
Тошкент метрополитенинг Юнусобод йўналишидаги айрим бекатларнинг вақтинчалик ёпилиши сабабли ташкил этилаётган мазкур йўналишдаги автобуслар ҳар куни соат 05:00 дан 00:00 га қадар 3 дақиқалик интервал билан ҳаракатланади.
«Тошшаҳартрансхизмат»нинг маълум қилишича, 26 августдан бошлаб метрополитен йўналишининг «Юнусобод» ва «Туркистон» станциялари ишга туширилгунга қадар 2м-сонли «Юнусобод 12-даҳаси – Шахристон метроси» оралиғида вақтинчалик хизмат кўрсатувчи бепул метробус йўналиши ташкил этилмоқда.
Мазкур ташкил этилаётган вақтинчалик метробус йўналишидаги ҳаракат жадваллари сони «King Long» русумли 10 та автобуслар асосида ташкил этилади.
Қайд этилишича, йўналишнинг иш тартиби 3 дақиқалик оралиқ интервал билан соат 05:00 дан 00:00 га қадар этиб белгиланган. Йўналиш Юнусобод мавзеси 12-даҳа бекатидан Юнусобод, «Туркистон» ва «Шахристон» метро бекатлари орқали тўхтаб ҳаракатланади.
Эслатиб ўтамиз, аввалроқ 26 август кунидан бошлаб Тошкент метрополитени «Юнусобод» йўналишининг «Юнусобод» ва «Туркистон» бекатлари режали профилактик ишлар сабабли 4 ой муддатга ёпилиши ҳақида хабар берилганди.
