Тошкентда имом-хатибнинг кэшбек бўйича чиқиши кескин мунозараларга сабаб бўлмоқда
Ҳолатда Мусулмонлар идораси муносабат билдирди.
24 август куни Тошкент шаҳридаги “Имом Термизий” жоме масжиди имом-хатиби Исоқжон Бегматовнинг солиқлар ва “кэшбэк” иловаларидан фойдаланиш тўғрисидаги ўзбошимчалик ила қилган чиқиши кескин мунозараларга сабаб бўлди. Айниқса, савдо билан шуғулланганлик учун солиқ тўлаш, касса аппарати ишлатиш ва “кэшбэк” иловаларини жорий этиш ҳақидаги имом-хатибнинг чиқишига ҳақли эътирозлар билдирилди.
Таъкидланишича, И.Бегматовнинг мазкур қарашлари Ўзбекистон мусулмонлари идораси муносабатини мутлақо ифода этмайди, балки унинг ўзбошимчалик ила айтган шахсий фикридир. Фатво маркази томонидан ушбу фаолият тури батафсил ўрганилиб, «Кешбэк» каби иловалар орқали келиб тушадиган маблағ, мукофот ёки бонус жоизлиги ҳақида авваллари икки марта фатво берилган. Бунда ғарар (алдов) ва рибо аралашмаслиги шарт қилинган.
Ўзбекистон мусулмонлари идораси томонидан аввал ижрога йўналтирилган ҳужжатларда имом-домлалар амалдаги қонунчилик талабларига риоя этишлари, меҳнат мажбуриятларига амал қилишлари ҳамда мунозарага сабаб бўлувчи чиқишлар қилмасликлари қатъий белгилаб қўйилган.
“Афсуски, Исоқжон Бегматов мазкур чиқишида меъёрий ҳужжатлар талабларини бузиб, ушбу йўналишдаги буйруқлар, ички тартиб қоидалар ҳамда меҳнат мажбуриятларига амал қилмагани маълум бўлди.
Юқоридагилардан келиб чиқиб, Ўзбекистон мусулмонлари идораси Ички назорат комиссияси шу йил 25 август куни Тошкент шаҳридаги “Имом Термизий” жоме масжиди имом-хатиби Исоқжон Бегматов хатти-ҳаракатини кўриб чиқади”, – дейилади хабарда.
